La relèva
Jòrdi Peladan
Jòrdi PELADAN es nascut lo 20 de mai de 1938 a Alès d'una familha cevenòla. Demòra a Nimes mas a servat l'ostal pairal, un mas perdut de la Cevena. A ensenhat las matematicas a l'Universitat de Montpelhièr. Diplomat d'occitan, ensenha aquela lenga dins los talhièrs de la Marpoc, que n'es estat President una brava passa (un trentenat d'annadas), e al Cadref de Nimes e Alès. Es ara President d'onor de la Marpoc e membre del C.A. de l'I.E.O. 30 (ne foguèt secretàri pendent qualques annadas)
Faguèt partida del Conselh d'Administracion e foguèt president de la seccion Lengadòc de l'IEO. Foguèt tanben vici-President del CAOC (Cercle d'Amistat Occitna-Catalan, mas la seccion occitan existís pas mai).
Es sòci titular de l'Académie des Hauts Cantons.
organisacion
acompanhator
itinerari
Ghislaine Marcon
itinerari
acompanhatritz
acompanhator
Jules Verret
Nascuda a Nimes en 1949, quitèri lo departament sonque qualques annadas encausa lo trabalh o la formacion. Aprèp un començament de vida professionala un pauquet bassacat, faguèri professor d’espanhòl primièr en licèu professional, a Castras, per contunhar en collègi, a Nimes e puèi a Sant Ipolit del Fòrt. Prenguèri la retirada, fa qualques annadas e mudèri a Sant Joan de Gardonenca que me voliái instalar dins las Cevenas.
Aquelas montanhas, las descobriguèri e las presèri mercé lo camp de las Balmas, dins las annadas seissanta. D’aquí me venguèt lo plaser jamai assadolat de las trepar de pè. Fa qualques annadas venguèri sòci del GARA (Grop Alesenc de Recerca Arqueologica) e per aquesta rason cèrqui de vestigas de la preïstòria cevenola, mai que mai sul sèrre de la Vièlha Morta.
Coneguèri Jòrdi Peladan a l’escasença de las passejadas del FIRA qu’acompanha sus sa montanha tant aimada. Me marquèri puèi a sos corses d’occitan a Alès, al CADREF, que me sembla que la coneissença del mitan se pòt pas desseparar de la lenga. E per aquò lo rendètz-vos annadièr a la Capelona es d’a fons simbolic d’aquel biais de far a l’encòp sensible e « sabent ».
Corinne Lhéritier
gestion site
cartas numericas
Soi nascuda en 1966 a Alès (Gard), amb qualques jorns de retard per remirar lo solelh del 10 d'agost! Espeliguèri entre Nimes e Cevenas, entre lo patoes dels grands, mitat amagat mitat enebit, e lo tornar a la lenga del paire.
Dintrèri a la Calandreta de Montpelhièr en 1987, puèi dubriguèri la de Nîmes, amb un ponhal d’amic·gas, en 1989. Mon trabalh de regenta me buta a far reviradas sus reviradas per la classa (fichas tecnicas, documentaris, “primièras lecturas”…), puèi pel public : “Seta” de l’italian Alessandro Baricco e mai recentament “Los ignorants”, lo roman grafic (BD) d’Etienne Davodeau…
Ensagi de cavar de longa las questions linguisticas, mai que mai a l’entorn de l’intercompreneson, tant coma las questions pedagogicas…
Dins lo quotidian de la classa, ensagi de partejar e transmetre aquel amor de la lenga, per son usatge quotidian, e per una cabussada pregonda dins la literatura jos totas sas formas, en particular la poesia. Tre que se pòt, los escolans de mas classas son conidats a legir, escriure, jogar amb los mots e la(s) lenga(s).
Son tanben convidats a marchar sovent ! La marcha, que siá cevenòla o nordica, la partegi amb plaser !